ಶಹಾಪುರ: ಸಗರನಾಡಿನ ಹಿರಿಯ ಚೇತನ, ರಾಜಕೀಯ ಮುತ್ಸದ್ದಿ, ಧಾರ್ಮಿಕ, ಸಾಮಾಜಿಕ ಹಾಗೂ ಶಿಕ್ಷಣ ಹಾಗೂ ದಾಸೋಹ ಪ್ರೇಮಿ ಬಸವರಾಜಪ್ಪಗೌಡ ದರ್ಶನಾಪುರ ಅವರ ನುಡಿ ನಮನ ಕಾರ್ಯಕ್ರಮವು ನಗರದ ಸಿ.ಬಿ. ವಿದ್ಯಾವರ್ಧಕ ಸಂಸ್ಥೆಯ ಆವರಣದಲ್ಲಿ ಭಾವಪೂರ್ಣವಾಗಿ ನಡೆಯಿತು.
ಶ್ರೀ ಚರಬಸವೇಶ್ವರ ಸಂಸ್ಥಾನ ಗದ್ದುಗೆ ಮಠ ಶಹಪುರಧ ಪೂಜ್ಯ ಶ್ರೀ ವೇ.ಮೂ.ಬಸವಯ್ಯ ಶರಣರು
ಅರಳಿ ಮರಕ್ಕೆ ನೀರು ಎರೆಯುವುದರ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು.
ಮಾಜಿ ಜಿಲ್ಲಾ ಪಂಚಾಯಿತಿ ಉಪಾಧ್ಯಕ್ಷರಾದ ಶಂಕ್ರಣ್ಣ ವಣಿಕ್ಯಾಳ ಕಾರ್ಯಕ್ರಮ ಉದ್ದೇಶಿಸಿ ಮಾತನಾಡುತ್ತಾ, ಶಿವಶರಣರಿಗೆ ಮರಣವಿಲ್ಲ ಎಂಬಂತೆ ಬಸವರಾಜಪ್ಪಗೌಡ ದರ್ಶನಾಪುರ ಅವರು ನಮ್ಮಿಂದ ಕಣ್ಮರೆಯಾಗಿದ್ದರೂ, ಅವರು ಮಾಡಿದ ಉತ್ತಮ ಕಾರ್ಯಗಳು ಇಂದಿಗೂ ನಮ್ಮ ಕಣ್ಮುಂದಿವೆ.ಬಡ ಮಕ್ಕಳ ಶಿಕ್ಷಣಕ್ಕೆ ಬೆಳಕಾದ ಬಸವರಾಜಪ್ಪಗೌಡ ದರ್ಶನಾಪುರ, ಧಾರ್ಮಿಕ ಹಾಗೂ ಶೈಕ್ಷಣಿಕ ಕ್ಷೇತ್ರಗಳಿಗೆ ಅವರು ನೀಡಿದ ಕೊಡುಗೆ ಸದಾ ಸ್ಮರಣೀಯ ಎಂದು ಭಾವುಕರಾಗಿ ನುಡಿದರು.ಶ್ರೀಶೈಲದಲ್ಲಿ ಯುಗಾದಿ ಹಾಗೂ ಶ್ರಾವಣ ಮಾಸದ ಸಂದರ್ಭದಲ್ಲಿ ಒಂದು ತಿಂಗಳ ಕಾಲ ಭಕ್ತರಿಗೆ ದಾಸೋಹ ನಡೆಸಿಕೊಡುತ್ತಿದ್ದ ಅವರು, ಧಾರ್ಮಿಕ ಕ್ಷೇತ್ರಕ್ಕೂ ಹೆಚ್ಚಿನ ಆದ್ಯತೆ ನೀಡಿದ್ದರು ಎಂದರು.
ಪೂಜ್ಯ ವೇದಮೂರ್ತಿ ಬಸವಯ್ಯ ಶರಣರು ಆಶೀರ್ವಚನ ನೀಡಿದರು.ಘೇವರಚಂದ ಜೈನ್ ಸಂಸ್ಥೆಯ ಕಾರ್ಯದರ್ಶಿಗಳು ಪ್ರಾಸ್ತಾವಿಕ ಮಾತನಾಡಿದರು,ಸಿದ್ರಾಮ್ ಹೊನ್ಕಲ್ ಸೇರಿದಂತೆ ಹಲವು ಗಣ್ಯರು ಮಾತನಾಡಿ ಬಸವರಾಜಪ್ಪಗೌಡ ದರ್ಶನಾಪುರ ಅವರ ಸಮಾಜಮುಖಿ ಸೇವೆಯನ್ನು ಸ್ಮರಿಸಿದರು.
ಕಾರ್ಯಕ್ರಮದಲ್ಲಿ ಮಾಜಿ ಸಚಿವರು ಹಾಗೂ ಶಾಸಕರಾದ ಶರಣಬಸಪ್ಪಗೌಡ ದರ್ಶನಾಪುರ, ಸಂಸ್ಥೆಯ ನಿರ್ದೇಶಕರು ಹಾಗೂ ರಾಯಚೂರು ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಬಸವರಾಜಪ್ಪಗೌಡ ಇಟಗಿ, ಮಲ್ಲಣ್ಣ ಸಾಹು ಮಡ್ಡಿ, ಭೀಮರೆಡ್ಡಿ ಬೈರೆಡ್ಡಿ, ಶ್ರೀನಿವಾಸರಾವ್ ಕುಲಕರ್ಣಿ, ಸಂಜೀವರೆಡ್ಡಿ ಪಾಟೀಲ ದರ್ಶನಾಪುರ, ಸಿದ್ದಲಿಂಗಣ್ಣ ಆನೇಗುಂದಿ,ಶಿವುಮಾಂತಪ್ಪ ಚಂದಾಪುರ ಬ್ಲಾಕ್ ಕಾಂಗ್ರೆಸ್, ಡೋಂಗ್ರು ನಾಯಕ್, ಚಂದ್ರಶೇಖರ ಆರಬೋಳ, ಬಸವರಾಜಪ್ಪಗೌಡ ತಂಗಡಗಿ, ಸೇರಿದಂತೆ ಗಣ್ಯರು, ಶಾಲಾ ಮಕ್ಕಳು, ಶಿಕ್ಷಕರು ವೃಂದದವರು ಹಾಗೂ ಅಪಾರ ಸಂಖ್ಯೆಯ ದರ್ಶನಾಪುರ ಅಭಿಮಾನಿಗಳು ಉಪಸ್ಥಿತರಿದ್ದರು.
“ನಮ್ಮ ಕಾಕನವರಾದ ಬಸವರಾಜಪ್ಪಗೌಡ ದರ್ಶನಪುರ ಅವರು ಜನಸಾಮಾನ್ಯರೊಂದಿಗೆ ಬೆರೆತು,ಅವರ ಸಮಸ್ಯೆಗಳಿಗೆ ಸ್ಪಂದಿಸಿ ಕೆಲಸ ಮಾಡುತ್ತಿದ್ದ ಅಪರೂಪದ ವ್ಯಕ್ತಿತ್ವದವರು.ಯಾವುದೇ ಕೆಲಸಕ್ಕಾಗಿ ಅವರ ಬಳಿ ಹೋದಾಗ ಇಲ್ಲ ಎಂಬ ಮಾತು ಅವರಿಂದ ಬರುತ್ತಿರಲಿಲ್ಲ. ಸಾಧ್ಯವಾದಷ್ಟು ಸಹಾಯ ಮಾಡಿ ಕೆಲಸ ಮಾಡಿಕೊಡುತ್ತಿದ್ದರು.ಮಧ್ಯಮ ವರ್ಗದವರು,ಬಡವರು,ಗ್ರಾಮೀಣ ಜನರೊಂದಿಗೆ ಹೆಚ್ಚಿನ ಒಡನಾಟ ಹೊಂದಿದ್ದ ಅವರು,ಹಲವು ವರ್ಷಗಳ ಕಾಲ ಜನರಿಗೆ ನ್ಯಾಯ ಒದಗಿಸಲು ಶ್ರಮಿಸಿದರು. ಸಂಸದರು ಹಾಗೂ ಶಾಸಕರಾಗುವ ಅವಕಾಶಗಳು ಒದಗಿ ಬಂದಿದ್ದರೂ, ಅಧಿಕಾರಕ್ಕಿಂತ ಜನಸೇವೆ ಮತ್ತು ಸಮಾಜಮುಖಿ ಕಾರ್ಯಗಳಿಗೆ ಹೆಚ್ಚಿನ ಆದ್ಯತೆ ನೀಡಿದರು.ನಾನು ರಾಜಕೀಯವಾಗಿ ಇಷ್ಟು ಎತ್ತರಕ್ಕೆ ಬೆಳೆಯಲು ಅವರ ಮಾರ್ಗದರ್ಶನ ಮತ್ತು ಆಶೀರ್ವಾದವೇ ಪ್ರಮುಖ ಕಾರಣ.ಅವರ ಶಿಕ್ಷಣದ ಕನಸನ್ನು ನನಸು ಮಾಡುವ ನಿಟ್ಟಿನಲ್ಲಿ ತಾಲೂಕಿನಲ್ಲಿ ಶಿಕ್ಷಣ ಕ್ಷೇತ್ರಕ್ಕೆ ಮುಂದಿನ ದಿನಗಳಲ್ಲಿ ಹೆಚ್ಚಿನ ಆದ್ಯತೆ ನೀಡಿ ಅವರ ಆಶಯವನ್ನು ಸಾಕಾರಗೊಳಿಸಲಾಗುವುದು”.
ಶರಣಬಸಪ್ಪಗೌಡ ದರ್ಶನಾಪುರ,
ಮಾಜಿ ಸಚಿವರು ಹಾಗೂ ಶಾಸಕರು.