ಪೊಳ್ಳುಗಟ್ಟಿದ ಸಜ್ಜೆ ತೆನೆ | ಕಳಪೆ ಬೀಜ ವಿತರಣೆ ರೈತರ ಆರೋಪ

ತಾಲೂಕಿನ ದರಿಯಾಪುರ ಗ್ರಾಮದಲ್ಲಿ ಹಿಂಗಾರು ಹಂಗಾಮಿನಲ್ಲಿ ಬಿತ್ತನೆ ಮಾಡಿದ್ದ ಸಜ್ಜೆ ಕಾಳು ಕಟ್ಟುವ ಹಂತದಲ್ಲಿ ಪೊಳ್ಳಾಗಿದೆ ಎಂದು ರೈತರು ಆರೋಪಿಸಿದ್ದಾರೆ. ಖಾಸಗಿ ಕಂಪನಿಯಿಂದ ತೆಗೆದುಕೊಂಡು ಬಂದಿದ್ದ ಸಜ್ಜೆ ಬೀಜಗಳು ನಕಲಿಯಾಗಿವೆ. ಪ್ರತಿ ಪಾಕೇಟಿಗೆ 800 ರೂ. ಖರೀದಿಸಿ ಬಿತ್ತನೆ ಮಾಡಿದ್ದೇವೆ. ರಸಗೊಬ್ಬರ, ಕೂಲಿ ಸೇರಿದಂತೆ ಕನಿಷ್ಠ ಎಂದರೂ ಪ್ರತಿ ಎಕರೆಗೆ 10,000ಯಂತೆ ಖರ್ಚು ಮಾಡಿದ್ದೇವೆ. ಇನ್ನೇನು ಬೆಳೆ ಕಾಳು ಕಟ್ಟುವ ಹಂತದಲ್ಲಿಯೇ ಸುಂಕ ಕಟ್ಟಿ ಜೋಳ್ಳಾಗಿವೆ. ದರಿಯಾಪುರ ಸೇರಿದಂತೆ ಸುತ್ತಲಿನ ಸುಮಾರು 50 ಎಕರೆಗೂ ಹೆಚ್ಚು ಜಮೀನಿನಲ್ಲಿ 30ಕ್ಕೂ ಹೆಚ್ಚು ರೈತರು ಬಿತ್ತನೆ ಮಾಡಿದ್ದು, ಈಗ ನಷ್ಟ ಅನುಭವಿಸಿದ್ದೇವೆ ಎಂದು ರೈತ ಯಂಕಣ್ಣ ಅಳಲು ತೋಡಿಕೊಂಡರು.

ತಾಲೂಕು ಸಹಾಯಕ ಕೃಷಿ ನಿರ್ದೇಶಕ ಸುನಿಲಕುಮಾರ ಯರಗೋಳ ಭೇಟಿ ನೀಡಿ ಸಜ್ಜೆ ಬೆಳೆ ಪರಿಶೀಲಿಸಿದರು. ಸಜ್ಜೆಯ ಕಾಳು ಸೆಟ್ಟಿಂಗ್ ಸರಿಯಾಗಿ ಆಗಿಲ್ಲ. ಸಜ್ಜೆಯ ತೆನೆಯ ಶೇ. 50ರಷ್ಟು ಪೊಳ್ಳಾಗಿವೆ. ಇದಕ್ಕೆ ಸಂಬಂಧಪಟ್ಟಂತೆ ರಾಯಚೂರು ಕೃಷಿ ವಿಶ್ವವಿದ್ಯಾಲಯಕ್ಕೆ ಪತ್ರ ಬರೆಯಲಾಗುವುದು. ವರದಿ ಬಂದ ನಂತರ ಕ್ರಮ ಕೈಗೊಳ್ಳುತ್ತೇವೆ ಎಂದು ತಿಳಿಸಿದ್ದಾರೆ. ರೈತರು ತಾವು ತೆಗೆದುಕೊಂಡ ರಸೀದಿಗಳನ್ನು ಜೋಪಾನವಾಗಿ ಇಟ್ಟುಕೊಳ್ಳಬೇಕು ಎಂದು ತಿಳಿಸಿದರು.