ಶಹಾಪುರ: ನಗರದ ಶ್ರೀ ಕಾಳಿಕಾದೇವಿ ದೇವಸ್ಥಾನದಲ್ಲಿ ಶ್ರಾವಣ ಮಾಸದ ಅಂಗವಾಗಿ ಆಯೋಜಿಸಿದ್ದ ಭಜನಾ ಮಂಗಳ ಕಾರ್ಯಕ್ರಮದಲ್ಲಿ ಸಾನಿಧ್ಯ ವಹಿಸಿ ಆಶೀರ್ವಚನ ನೀಡಿದ ವಿಶ್ವಕರ್ಮ ಏಕದಂಡಿಗಿ ಮಠದ ಪೂಜ್ಯಶ್ರೀ ವಿರುಪಾಕ್ಷ ಸ್ವಾಮೀಜಿ, ಶ್ರಾವಣ ಮಾಸವು ಶ್ರವಣ, ಭಜನೆ, ಕೀರ್ತನೆ, ಪುರಾಣ-ಪ್ರವಚನಗಳ ಮೂಲಕ ಆತ್ಮಚಿಂತನೆಗೆ ಅವಕಾಶ ನೀಡುವ ಪವಿತ್ರ ಮಾಸವಾಗಿದೆ ಎಂದರು.
ಭಕ್ತಿ, ಸತ್ಸಂಗ ಹಾಗೂ ಪ್ರಾರ್ಥನೆಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡರೆ ಕಷ್ಟದ ಸಂದರ್ಭದಲ್ಲಿ ಭಗವಂತನ ಕೃಪೆ ದೊರೆಯುತ್ತದೆ. ಭಕ್ತಿಯ ಮಾರ್ಗವನ್ನು ಪ್ರತಿಯೊಬ್ಬರೂ ಅನುಸರಿಸುವುದು ಉತ್ತಮ ಸಂಸ್ಕೃತಿ ಎಂದು ಹೇಳಿದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಿಶ್ವಕರ್ಮ ಸಮಾಜದ ಅಧ್ಯಕ್ಷ ರಾಜಶೇಖರ ಪತ್ತಾರ ಬೊಮ್ಮನಹಳ್ಳಿ ವಹಿಸಿದ್ದರು. ಸಂತೋಷ ಪತ್ತಾರ ಸೇರಿದಂತೆ ಹಲವು ಭಜನಾ ಕಲಾವಿದರು ಅಹೋರಾತ್ರಿ ಭಜನೆ ನಡೆಸಿದರು. ಬೆಳಗಿನವರೆಗೆ ನಡೆದ ಭಜನಾ ಕಾರ್ಯಕ್ರಮದಲ್ಲಿ ವಿಶ್ವಕರ್ಮ ಸಮಾಜದ ಮುಖಂಡರು ಹಾಗೂ ಸಕಲ ಸದ್ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು.