ಹೆಮ್ಮೆಯ ಜನನಾಯಕನಿಗೆ ಅಂತಿಮ ನಮನ ಸಲ್ಲಿಸಿದ ಅಪಾರ ಜನಸ್ತೋಮ : ಅಗಲಿದ ಹಿರಿಯ ರಾಜಕೀಯ ಧುರೀಣ ಬಸವರಾಜಪ್ಪಗೌಡ ದರ್ಶನಾಪುರ : ಡಾ.ರಾಘವೇಂದ್ರ ಹಾರಣಗೇರಾ

ಶಹಾಪೂರ,

ಸಗರನಾಡಿನ ರಾಜಕೀಯ ಹಾಗೂ ಸಾಂಸ್ಕೃತಿಕ ಶೈಕ್ಷಣಿಕ ಪರಿಸರದಲ್ಲಿ ಹಿರಿಯ ಧುರೀಣ ಬಸವರಾಜಪ್ಪಗೌಡ ದರ್ಶನಾಪುರ ಅವರು ತುಂಬಾ ವಿಶಿಷ್ಠವಾಗಿ ಕಾಣುತ್ತಾರೆ. ಸಾಮಾಜಿಕ, ಧಾರ್ಮಿಕ, ದಾಸೋಹ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದ ಅವರು ಎಲ್ಲಾ ಸಮುದಾಯಗಳ ಪ್ರೀತಿ ವಿಶ್ವಾಸಕ್ಕೆ ಪಾತ್ರರಾದ ಜನಪರ ಜನನಾಯಕರಾಗಿದ್ದರು. ಹಲವು ದಿನಗಳಿಂದ ಅನಾರೋಗ್ಯ ಸಮಸ್ಯೆಯನ್ನು ಎದುರಿಸುತ್ತಿದ್ದ ಅವರು ಗುರುವಾರÀ ಬೆಳಗ್ಗೆ ನಿzsನÀರಾದರು. ಸಾಯಂಕಾಲ ೫ ಗಂಟೆಗೆ ದರ್ಶನಾಪುರ ಗ್ರಾಮದ ಸ್ವಂತ ಹೊಲದಲ್ಲಿ ಅಂತ್ಯಕ್ರೀಯೆ ಜರುಗಿತು. ಸಗರನಾಡಿನ ಹಾಗೂ ಕಲ್ಯಾಣ ಕರ್ನಾಟಕದ ಅನೇಕ ರಾಜಕೀಯ ಮುಖಂಡರು ಸೇರಿದಂತೆ ಸಹಸ್ರಾರು ಜನ ಅಂತ್ಯಸAಸ್ಕಾರದಲ್ಲಿ ಪಾಲ್ಗೊಂಡು ಭಾವಪೂರ್ಣ ಅಂತಿಮ ನಮನ ಸಲ್ಲಿಸಿದರು.

ಜನಾನುರಾಗಿ ಬಾಪುಗೌಡ ದರ್ಶನಾಪುರ ಅವರ ಕಿರಿಯ ಸಹೋದರ ಹಾಗೂ ಶಾಸಕ ಶರಣಬಸಪ್ಪಗೌಡ ದರ್ಶನಾಪುರ ಅವರ ಚಿಕ್ಕಪ್ಪನವರಾದ ಬಸವರಾಜಪ್ಪಗೌಡ ದರ್ಶನಾಪುರ ಅವರು ಹಿರಿಯ ಸಹೋದರ ಬಾಪುಗೌಡರು ಸ್ಥಾಪಿಸಿದ ಚರಬಸವೇಶ್ವರ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷರಾಗಿ ಸಾವಿರಾರು ಗ್ರಾಮೀಣ ಭಾಗದ ಬಡ ವಿದ್ಯಾರ್ಥಿಗಳಿಗೆ ವಿಶೇಷವಾಗಿ ಹೆಣ್ಣುಮಕ್ಕಳಿಗೆ ಅಕ್ಷರ ದಾಸೋಹ ನೀಡುವ ಮೂಲಕ ಅವರ ಉಜ್ವಲ ಭವಿಷ್ಯಕ್ಕೆ ಶ್ರಮಿಸಿದ ಶಿಕ್ಷಣ ಪ್ರೇಮಿಯಾಗಿದ್ದರು.

ಬಸವರಾಜಪ್ಪಗೌಡ ದರ್ಶನಾಪುರ ಅವರು ಕೇವಲ ರಾಜಕಾರಣಿಯಾಗಿರದೆ ಒಬ್ಬ ಹಿರಿಯ ಮುತ್ಸದ್ದಿಯಾಗಿ ಜನರ ಸಮಸ್ಯೆಗಳಿಗೆ ಸ್ಪಂದಿಸುತ್ತ, ಅವರ ನೋವು-ನಲಿವುಗಳಲ್ಲಿ ಭಾಗಿಯಾಗುತ್ತಿದ್ದ ಮಾನವೀಯ ಅಂತಃಕರಣದ ನಾಯಕರಾಗಿದ್ದರು. ಅನ್ನದಾಸೋಹ ಕಾರ್ಯದಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದ ಅವರು ಧಾರ್ಮಿಕ ಸಮಾರಂಭಗಳು, ಜಾತ್ರೆಗಳು, ಸಾಮಾಜಿಕ ಕಾರ್ಯಗಳಲ್ಲಿ ನಿರಂತರ ದಾಸೋಹ ಸೇವೆ ಸಲ್ಲಿಸುತ್ತಿದ್ದರು. ಪ್ರತಿವರ್ಷ ಪವಿತ್ರ ಶ್ರೀಶೈಲ ಮಲ್ಲಿಕಾರ್ಜುನ ಸ್ವಾಮಿಜಿಯ ದರ್ಶನಕ್ಕಾಗಿ ಪಾದಯಾತ್ರೆಯಲ್ಲಿ ಹಾಗೂ ವಾಹನಗಳಲ್ಲಿ ಆಗಮಿಸುವ ಲಕ್ಷಾಂತರ ಭಕ್ತಾಧಿಗಳಿಗೆ ನಿರಂತರವಾಗಿ ತಿಂಗಳ ಪರ್ಯಂತ ಅನ್ನದಾಸೋಹ ಏರ್ಪಡಿಸುತ್ತಿದ್ದರು. ಸಾಹಿತ್ಯ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ತನು ಮನ ಧನಗಳ ಮೂಲಕ ಸಹಾಯ ನೀಡಿ ಪ್ರೋತ್ಸಾಹ ನೀಡುತ್ತಿದ್ದರು.


ಪ್ರಸಿದ್ಧ ಆಧ್ಯಾತ್ಮಿಕ ಕೇಂದ್ರವಾದ ಯಾನಗುಂದಿ ಮಾತೆ ಮಾಣಿಕೇಶ್ವರಿ ತಾಯಿಯವರ ಕ್ಷೇತ್ರದ ಅಭಿವೃದ್ಧಿಯಲ್ಲಿ ಬಸವರಾಜಪ್ಪಗೌಡ ದರ್ಶನಾಪುರ ಅವರ ಕೊಡುಗೆ ಅಪಾರವಾದುದ್ದು. ಮಹಾತಾಯಿ ಅವರ ಮೇಲೆ ಅಪಾರ ಭಕ್ತಿಯನ್ನು ಹೊಂದಿದ್ದ ಅವರು ತಾಯಿಯವರೊಂದಿಗೆ ಕ್ಷೇತ್ರದ ಅಭಿವೃದ್ಧಿ ಕಾರ್ಯಗಳ ಕುರಿತು ಚರ್ಚಿಸುತ್ತಿದ್ದರು. ಧಾರ್ಮಿಕ, ಆಧ್ಯಾತ್ಮದ ಕಾಳಜಿ, ಅನ್ನದಾಸೋಹ ಔದಾರ್ಯ ಮತ್ತು ಸಾಂಸ್ಕೃತಿಕ ಪ್ರೀತಿಯ ಮನಸ್ಸುಳ್ಳವರಾಗಿದ್ದ ಬಸವರಾಜಪ್ಪಗೌಡ ದರ್ಶನಾಪುರ ಅವರ ನಿಸ್ವಾರ್ಥ ಸೇವೆ ಸಗರನಾಡಿನಲ್ಲಿ ಸದಾ ಅಮರ ಎಂದು ಹೇಳಿದರೆ ತಪ್ಪಾಗಲಾರದು.

ಗ್ರಾಮೀಣ ಪ್ರದೇಶಗಳಲ್ಲಿ ಜನರ ನಡುವೆ ತಲೆದೋರುತ್ತಿದ್ದ ಸಣ್ಣಪುಟ್ಟ ಜಗಳಗಳು, ಕೌಟುಂಬಿಕ ಮನಸ್ಥಾಪಗಳು ಹಾಗೂ ವಿವಿಧ ಸಮುದಾಯಗಳ ನಡುವಿನ ಭಿನ್ನಾಭಿಪ್ರಾಯಗಳನ್ನು ಬಸವರಾಜಗೌಡರು ಅವರೊಂದಿಗೆ ಮುಖಾಮುಖಿ ಚರ್ಚಿಸಿ ಚಾಣಾಕ್ಷತನದಿಂದ ಮತ್ತು ಪ್ರೀತಿಯಿಂದ ಬಗೆಹರಿಸುತ್ತಿದ್ದರು. ಪ್ರತಿಯೊಬ್ಬರ ಮಾತನ್ನು ತಾಳ್ಮೆಯಿಂದ ಆಲಿಸಿ ಎರಡು ಕಡೆಯವರಿಗೆ ನೋವಾಗದಂತೆ ನ್ಯಾಯಸಮ್ಮತವಾದ ರೀತಿಯಲ್ಲಿ ಪಂಚಾಯತಿ ನಡೆಸಿ ಸಮಸ್ಯೆಗಳನ್ನು ಪರಿಹರಿಸುತ್ತಿದ್ದರು. ಜನರ ಸಮಸ್ಯೆಗಳು ಅನಗತ್ಯವಾಗಿ ಪೊಲೀಸ್ ಸ್ಟೇಶನ್ ಹಾಗೂ ನ್ಯಾಯಾಲಯಗಳ ಮೆಟ್ಟಿಲೇರಿ ಸಮಯ, ಹಣ ಮತ್ತು ಶಾಂತಿಯನ್ನು ಕಳೆದುಕೊಳ್ಳಬಾರದು ಎಂಬುದ ಅವರ ಆಶಯವಾಗಿರುತ್ತಿತು. ಈ ಮೂಲಕ ಜನರಲ್ಲಿ ಶಾಂತಿ, ಸೌಹಾರ್ದತೆ, ಸಾಮರಸ್ಯ ಕಾಪಾಡುತ್ತಿದ್ದರು.

ಶಹಾಪುರ ಕ್ಷೇತ್ರದ ಸರ್ವಾಂಗೀಣ ಅಭಿವೃದ್ಧಿಗೆ ಬುನಾದಿ ಹಾಕಿದ ಹೆಮ್ಮೆಯ ಜನನಾಯಕ ಹಾಗೂ ಹಿರಿಯ ಸಹೋದರ ಬಾಪುಗೌಡ ದರ್ಶನಾಪುರ ಅವರ ಅಕಾಲಿಕ ನಿಧನದ ನಂತರ ಬಸವರಾಜಪ್ಪಗೌಡ ದರ್ಶನಾಪುರ ಅವರು ಬಾಪುಗೌಡರ ಹಿರಿಯ ಸುಪುತ್ರ ಹಾಗೂ ಪ್ರಸ್ತುತ ಶಾಸಕರು ಮತ್ತು ಮಾಜಿ ಸಚಿವರಾದ ಶರಣಬಸಪ್ಪಗೌಡ ದರ್ಶನಾಪುರ ಅವರನ್ನು ನಾಡಿನ ಸಶಕ್ತ ನಾಯಕನಾಗಿ ರೂಪಿಸುವಲ್ಲಿ ಮಹತ್ವದ ಪಾತ್ರವಹಿಸಿದ್ದಾರೆ. ತಾವು ಕಂಡ ರಾಜಕೀಯ ಅನುಭವಗಳು, ಜನರೊಂದಿಗೆ ನಿಕಟ ಒಡನಾಟ, ಜನರ ಸಮಸ್ಯೆಗಳಿಗೆ ಸ್ಪಂದಿಸುವಿಕೆ ಮುಂತಾದ ಗುಣಗಳನ್ನು ಶರಣಬಸಪ್ಪಗೌಡರಲ್ಲಿ ಸದಾ ಜಾಗೃತವಾಗಿರಿಸಿದರು. ಬಾಪುಗೌಡರ ಜನಪ್ರೀಯತೆಯನ್ನು ಪುತ್ರ ಶರಣಬಸಪ್ಪಗೌಡರ ನಾಯಕತ್ವಕ್ಕೆ ಪೂರಕವಾಗಿ ಬೆಸೆಯುವಲ್ಲಿ ಬಸವರಾಜಪ್ಪಗೌಡರ ಸಂಘಟನಾ ಶಕ್ತಿ ಪ್ರಮುಖ ಪಾತ್ರ ವಹಿಸಿತ್ತು ಎಂದು ಹೇಳಬಹುದು. ಶಹಾಪುರ ತಾಲೂಕನ್ನು ಪ್ರತಿಯೊಂದು ಕ್ಷೇತ್ರದಲ್ಲಿ ಅಭಿವೃದ್ಧಿ ಸಾಧಿಸುವ ಕಾರ್ಯಗಳಲ್ಲಿ ಯಶಸ್ವಿಯಾಗಿ ಮುನ್ನೆಡೆಯಲು ನಾಡಿನ ಜೀವಪರ ಕಾಳಜಿವುಳ್ಳ ಜನನಾಯಕರಾಗಿ ಶರಣಬಸಪ್ಪಗೌಡರು ಹೊರಹೊಮ್ಮುವಲ್ಲಿ ಪ್ರೇರಣೆಯಾದರು.

ತಮ್ಮ ಸಹೋದರ ಬಾಪುಗೌಡ ದರ್ಶನಾಪುರ ಅವರ ಕುಟುಂಬದೊAದಿಗೆ ಸಾಮರಸ್ಯದ ಬಾವನಾತ್ಮಕ ಸಂಬAಧವನ್ನು ಮುಂದುವರೆಸಿಕೊAಡು ಬಂದಿದ್ದು ಅನುಕರಣೀಯ. ಇದು ಅವರ ಸಹೋದರತ್ವದ ಪ್ರೀತಿ ಮತ್ತು ಶ್ರೇಷ್ಠತೆಗೆ ಅತ್ಯುತ್ತಮ ಉದಾಹರಣೆ ಎಂದು ಹೇಳಬಹುದು.
ಸಗರನಾಡಿನ ರಾಜಕೀಯ, ಶೈಕ್ಷಣಿಕ ಸಾಮಾಜಿಕ ಕ್ಷೇತ್ರದಲ್ಲಿ ಹಿರಿಯ ಧುರೀಣರಾಗಿದ್ದ ಬಸವರಾಜಪ್ಪಗೌಡ ದರ್ಶನಾಪುರ ಅವರ ಬದುಕು ಮತ್ತು ವ್ಯಕ್ತಿತ್ವ ಎಲ್ಲರಿಗೂ ಮಾದರಿ. ಯಾವುದೇ ಅಧಿಕಾರ, ಹುದ್ದೆ ಬಯಸದೆ ಜನರೊಂದಿಗೆ ಬೆರೆತು ಸಾರ್ವಜನಿಕ ಸೇವೆ ಮಾಡಿದ ಅಪರೂಪದ ಮುತ್ಸದ್ಧಿ. ಅವರ ಅಗಲಿಕೆಯಿಂದ ನಾಡು ಒಬ್ಬ ಪ್ರಜಾ ವಾತ್ಸಲ್ಯದ ಹಿರಿಯ ಮಾರ್ಗದರ್ಶಕ ನಾಯಕನನ್ನು ಕಳೆದುಕೊಂಡಿದೆ. ಅವರ ಕಾರ್ಯಗಳು, ಜನರಿಗೆ ಹಂಚಿದ ಪ್ರೀತಿ ಶಾಶ್ವತವಾಗಿರುತ್ತವೆ.

 

Leave a Reply

Your email address will not be published. Required fields are marked *