Blog
ಮೂರನೇ ಕಣ್ಣು : ಬಸವಣ್ಣನವರ ಚಾರಿತ್ರ್ಯ ವಧೆ,ಅಕ್ಷಮ್ಯ ಅಪರಾಧ
ಮೂರನೇ ಕಣ್ಣು : ಬಸವಣ್ಣನವರ ಚಾರಿತ್ರ್ಯ ವಧೆ,ಅಕ್ಷಮ್ಯ ಅಪರಾಧ
ಮುಕ್ಕಣ್ಣ ಕರಿಗಾರ..
ವಿಶ್ವಗುರು ಬಸವಣ್ಣನವರ ಮಹೋನ್ನತ ವ್ಯಕ್ತಿತ್ವವನ್ನು ಅರ್ಥಮಾಡಿಕೊಳ್ಳದ ಅಪಕ್ವ ಮನಸ್ಕರವಿ ಹಂಜ್ ಮತ್ತು ರವಿ ಹಂಜ್ ಬರಹಗಳನ್ನು ಪ್ರಕಟಿಸುವ ಮೂಲಕ ವಿಕೃತಿ ಮೆರೆದ ವಿಶ್ವವಾಣಿ ದಿನಪತ್ರಿಕೆಯ ಸಂಪಾದಕ ವಿಶ್ವೇಶ್ವರ ಭಟ್ ಅವರ ವಿರುದ್ಧ ಸರಕಾರವೇ ಕ್ರಮಕ್ಕೆ ಮುಂದಾಗಿರುವುದು ಸಂತೋಷದ ಸಂಗತಿ.ಲಿಂಗಾಯತ ಸಮುದಾಯಕ್ಕೆ ಸೇರಿದ ಸಚಿವರುಗಳು ಸರಕಾರವನ್ನು ಒತ್ತಾಯಿಸುವ ಈ ಕಾರ್ಯವನ್ನು ಈ ಮೊದಲೇ ಮಾಡಬೇಕಿತ್ತು.ರವಿ ಹಂಜ್ ವಿದೇಶಿ ನೆಲದಿಂದ ಬಸವಣ್ಣನವರ ಬಗ್ಗೆ ದುರುದ್ದೇಶದ ವಿಡಿಯೋ ಮಾಡಿ ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿಯ ಬಿಡುತ್ತಿರುವುದು,ವಿಶ್ವವಾಣಿ ಪತ್ರಿಕೆಗೆ ಬಸವಣ್ಣನವರ ವಿರುದ್ಧ ಮನಸ್ಸಿಗೆ ಬಂದಂತೆ ಕಲ್ಪಿಸಿಕೊಂಡು ಬರೆಯುತ್ತಿರುವುದು ನಿರಂತರವಾಗಿ ನಡೆದೇ ಇತ್ತು.ಇದನ್ನು ಆರಂಭದಲ್ಲೇ ತಡೆದಿದ್ದರೆ ರವಿ ಹಂಜ್ ಬಸವಣ್ಣನವರ ತೇಜೋವಧೆಯನ್ನೇ ಗುರಿಯಾಗಿಸಿಕೊಂಡ ‘ ಬಸವ ಮಂಟಪ’ ದಂತಹ ಪುಸ್ತಕ ಪ್ರಕಟಿಸುವ ಸಾಹಸಕ್ಕೆ ಕೈ ಹಾಕುತ್ತಿರಲಿಲ್ಲ.ಈಗಲಾದರೂ ಎಚ್ಚೆತ್ತುಕೊಂಡು ಬಸವಣ್ಣನವರ ಬಗ್ಗೆ ವಿಕೃತಮನಸ್ಕರು ಎಸಗುತ್ತಿರುವ ಕುಕೃತ್ಯಗಳನ್ನು ತಡೆಯಬೇಕಿದೆ.
ಬಸವಣ್ಣನವರು ಈಗ ಬರಿ ಲಿಂಗಾಯತ ಸಮುದಾಯದ ನಾಯಕರು ಮಾತ್ರವಲ್ಲ, ಅವರು ಕರ್ನಾಟಕ ಸಾಂಸ್ಕೃತಿಕ ನಾಯಕರೂ ಹೌದು.ಸಿದ್ಧರಾಮಯ್ಯನವರು ಮುಖ್ಯಮಂತ್ರಿ ಆಗಿದ್ದಾಗ ‘ಬಸವಣ್ಣನವರು ಕರ್ನಾಟಕದ ಸಾಂಸ್ಕೃತಿಕ ನಾಯಕರು’ ಎನ್ನುವ ಚಾರಿತ್ರಿಕ ನಿಲುವು- ನಿರ್ಧಾರವನ್ನು ಕರ್ನಾಟಕ ಸರಕಾರವು ಕೈಗೊಂಡಿದೆ.ಕರ್ನಾಟಕದ ಸಾಂಸ್ಕೃತಿಕ ನಾಯಕರಾದ ಬಸವಣ್ಣನವರ ಬಗ್ಗೆ ದುರ್ಮತಿಗಳು ಕೆಟ್ಟದ್ದಾಗಿ ಬರೆಯುತ್ತಾರೆ ಎಂದರೆ ಅದು ಬರಿ ಬಸವಣ್ಣನವರ ಮೇಲಿನ ಹಲ್ಲೆಯಲ್ಲ,ಕರ್ನಾಟಕದ ಸಂಸ್ಕೃತಿಯ ಮೇಲಿನ ಹಲ್ಲೆ.ಬಸವಣ್ಣನವರು ಕರ್ನಾಟಕದ ಹೆಮ್ಮೆ ಮಾತ್ರವಲ್ಲ ವಿಶ್ವದ ಸಾಮಾಜಿಕ ಧಾರ್ಮಿಕ ಸುಧಾರಕರುಗಳಲ್ಲಿ ಬಸವಣ್ಣನವರ ಎತ್ತರದ ವ್ಯಕ್ತಿಗಳು ಸಿಗುವುದು ದುರ್ಲಭ.ಬಸವಣ್ಣನವರ ‘ವಿಭೂತಿ ವ್ಯಕ್ತಿತ್ವ’ ವನ್ನು ಒಪ್ಪಿಕೊಳ್ಳದ ಕುಹಕಿಗಳು ಬಸವಣ್ಣನವರ ಬಗ್ಗೆ ತಪ್ಪು ಅಭಿಪ್ರಾಯಗಳನ್ನು ಹರಡುತ್ತಿರುತ್ತಾರೆ.ಬಸವಣ್ಣನವರ ಬಗ್ಗೆ ಕುಹಕವಾಡುವುದೆಂದರೆ ಅದು ಮನುಷ್ಯತ್ವವಿರೋಧಿ ಮನೋಸ್ಥಿತಿ ಎಂದೇ ಅರ್ಥ.
ಬಸವಣ್ಣನವರ ಸಂಪೂರ್ಣ ವಚನಗಳನ್ನು ಓದದ,ಬಸವಣ್ಣನವರ ಬಗ್ಗೆ ಸಮಕಾಲೀನ ಶರಣರು ಹೇಳಿದ ಸಂಗತಿಗಳನ್ನು ಅರ್ಥಮಾಡಿಕೊಳ್ಳದ ಮತಿಜಡರುಗಳು ಬಸವಣ್ಣನವರ ಸೂರ್ಯಸದೃಶ ವ್ಯಕ್ತಿತ್ವದ ತೇಜೋವಧೆಯಲ್ಲಿ ನಿರತರಾಗಿದ್ದಾರೆ. ಸೂರ್ಯನಿಗೆ ಕೆಸರು ಎರಚಿದರೆ ಆ ಕೆಸರು ಎರಚುವ ಮೂರ್ಖರ ಮೈಮೇಲೆಯೇ ಬೀಳುತ್ತದೆ. ಶೂನ್ಯ ಸಿಂಹಾಸನಾಧೀಶ್ವರರಾಗಿದ್ದ ಅಲ್ಲಮಪ್ರಭುದೇವರು ಸಾಮಾನ್ಯರಲ್ಲ,ಸಾಕ್ಷಾತ್ ಶಿವಾಂಶ ಸಂಭೂತರು.ಯೋಗಸಿದ್ಧಿಯಲ್ಲಿ ಅಲ್ಲಮಪ್ರಭುದೇವರಿಗೆ ಸಮಾನರಾದ ಮತ್ತೊಬ್ಬ ಯೋಗಿ ಭಾರತದ ಅಧ್ಯಾತ್ಮ ಪರಂಪರೆಯಲ್ಲಿ ಇಲ್ಲ.ವ್ಯೋಮಕಾಯಸಿದ್ಧಿ ಪಡೆದ ಅತ್ಯಪರೂಪದ ಯೋಗಿಗಳು ಅಲ್ಲಮಪ್ರಭುಗಳು.ವಜ್ರಕಾಯಸಿದ್ಧಿ ಪಡೆದಿದ್ದ ಗೋರಕ್ಷನನ್ನು ಸೋಲಿಸಿ ಅವನಿಗೆ ಯೋಗದ ನಿಜತಿರುಳು ಆವುದೆಂಬುದನ್ನು ತೋರಿಸಿದ ವ್ಯೋಮಕಾಯರು ಅಲ್ಲಮ ಪ್ರಭುದೇವರು.ಆ ಕಾರಣದಿಂದ ಹಠಯೋಗ ಸಾಧಕರ ಕುರಿತ ಉತ್ತರಭಾರತದ ಯೋಗಕೃತಿಗಳಲ್ಲಿ ಕೂಡ ಅಲ್ಲಮಪ್ರಭುದೇವರನ್ನು ಅಗ್ರಗಣ್ಯರನ್ನಾಗಿ ಸ್ವೀಕರಿಸಿದ್ದಾರೆ. ಅಂತಹ ಅಲ್ಲಮಪ್ರಭುದೇವರು ” ಬಸವಣ್ಣನವರ ಶ್ರೀಪಾದಕ್ಕೆ ನಮೋ” ಎನ್ನಬೇಕಾದರೆ ಬಸವಣ್ಣನವರ ವ್ಯಕ್ತಿತ್ವ ಅದೆಷ್ಟು ಭವ್ಯೋಜ್ವಲವಾಗಿರಬೇಕು ? ಅಲ್ಲಮಪ್ರಭುದೇವರು ಮಾತ್ರವಲ್ಲ, ಬಾಲ್ಯದಲ್ಲಿಯೇ ಶ್ರೀಶೈಲ ಮಲ್ಲಿಕಾರ್ಜುನ ಶಿವನನ್ನು ಪ್ರತ್ಯಕ್ಷ ಕಂಡಿದ್ದ ಯೋಗಿ ಸಿದ್ಧರಾಮ,ಅಕ್ಕಮಹಾದೇವಿ,ಚೆನ್ನಬಸವಣ್ಣ,ವೀರಭದ್ರನ ಅವತಾರನೆಂದೇ ಜನಮಾನಸದಲ್ಲಿ ಪೂಜೆಗೊಳ್ಳುತ್ತಿರುವ ಮಡಿವಾಳ ಮಾಚಿದೇವರು ಸೇರಿದಂತೆ ಬಹಳಷ್ಟು ಜನ ಶರಣರು ಬಸವಣ್ಣನವರನ್ನು ಮುಕ್ತಕಂಠದಿಂದ ಹೊಗಳಿದ್ದಾರೆ. ಬಸವಣ್ಣನವರ ಕಾಲದಲ್ಲೇ ಅವರ ಹೆಸರು ಭಾರತದಾದ್ಯಂತ ಪ್ರಸಿದ್ಧಿಪಡೆದಿತ್ತು ಎಂದೇ ಕಾಶ್ಮೀರದ ಅರಸು ದಂಪತಿಗಳು ಸೇರಿದಂತೆ ದೇಶದ ವಿವಿಧ ಭಾಗಗಳಿಂದ ಬಂದವರು ಬಸವಣ್ಣನವರ ಮಹಾಮನೆ ಅನುಭವಮಂಟಪದಲ್ಲಿ ಒಂದಾಗುತ್ತಾರೆ.
ಬಸವಣ್ಣನವರನ್ನು ಟೀಕಿಸುವವರು ಅವರ ವ್ಯಕ್ತಿತ್ವದ ಕೆಚ್ಚನ್ನು ಅರ್ಥಮಾಡಿಕೊಳ್ಳಬೇಕು.ವಿಶ್ವದಲ್ಲಿ ಪ್ರಸಿದ್ಧವಾಗಿರುವ ಅಂಬೇಡ್ಕರ್ ಅವರ ಕನಸು ದೂರದೃಷ್ಟಿಯ ಪ್ರಬುದ್ಧ ಸಂವಿಧಾನದಂತೆ ದೇಶದ ಆಡಳಿತವು ನಡೆಯುತ್ತಿರುವ ಇಪ್ಪತ್ತೊಂದನೆಯ ಶತಮಾನದ ಭಾರತದಲ್ಲಿ ಇಂದಿಗೂ ಅಂತರ್ ಜಾತಿ ವಿವಾಹಗಳನ್ನು ನಮ್ಮ ಸಮಾಜ ಅರಗಿಸಿಕೊಳ್ಳುತ್ತಿಲ್ಲ.ಮರ್ಯಾದೆ ಹತ್ಯೆ ಪ್ರಕರಣಗಳು ಘಟಿಸುತ್ತಿರುವುದು ಸಾಮಾನ್ಯ ಸಂಗತಿಯಾಗಿದೆ.ದಲಿತರನ್ನು ಇಂದಿಗೂ ದೇವಾಲಯಗಳಲ್ಲಿ ಬಿಡದೆ ತಡೆಯುವ ಕೃತ್ಯಗಳು ನಡೆಯುತ್ತಿರುತ್ತವೆ.ಬಸವಣ್ಣನವರು ಹನ್ನೆರಡನೆಯ ಶತಮಾನದ ಪ್ರಜಾಪ್ರಭುತ್ವದ ಗಂಧಗಾಳಿ ಇಲ್ಲದ ರಾಜಪ್ರಭುತ್ವದ ಕಾಲದಲ್ಲಿ ಅರಸ ಬಿಜ್ಜಳನ ಪ್ರಾಧಾನಿಯಾಗಿದ್ದುಕೊಂಡೇ ಸಮಾಜದ ವಿರೋಧವನ್ನು ಲೆಕ್ಕಿಸದೆ ಬ್ರಾಹ್ಮಣ ಮಧುವರಸನ ಮಗಳನ್ನು ದಲಿತ ಶರಣ ಹರಳಯ್ಯನ ಮಗನಿಗೆ ಮದುವೆ ಮಾಡಿಸುತ್ತಾರೆ.ಶೂದ್ರರು,ದಲಿತರುಗಳಿಗೆ ದೇವಾಲಯಗಳಲ್ಲಿ ಪ್ರವೇಶ ಇಲ್ಲ ಎನ್ನುವ ಕಾರಣದಿಂದ ದೇವಾಲಯ ವ್ಯವಸ್ಥೆಯನ್ನು ಧಿಕ್ಕರಿಸಿ ಎಲ್ಲರ ದೇಹಗಳನ್ನು ಕೈಲಾಸವನ್ನಾಗಿ ಪರಿವರ್ತಿಸಿ ಸರ್ವರ ಕೈಗಳಲ್ಲಿ ಇಷ್ಟಲಿಂಗವನ್ನು ಇಡುತ್ತಾರೆ. ಲಿಂಗ ತಾರತಮ್ಯ ಸಲ್ಲದೆಂದು ಅನುಭವ ಮಂಟಪದಲ್ಲಿ ಮಹಿಳಾವಚನಕಾರ್ತಿಯರಿಗೆ ಮುಕ್ತ ಅವಕಾಶ ನೀಡುತ್ತಾರೆ. ದಲಿತ ಸಮುದಾಯ ಶರಣರುಗಳಿಗೆ ಅನುಭವ ಮಂಟಪದಲ್ಲಿ ಅಗ್ರಮನ್ನಣೆ ನೀಡುತ್ತಾರೆ.ತಳಸಮುದಾಯದ ನಟುವ ಜಾತಿಯ ಅಲ್ಲಮಪ್ರಭುದೇವರನ್ನು ಶೂನ್ಯಸಿಂಹಾಸನಾಧೀಶ್ವರರನ್ನಾಗಿಸಿದ್ದು ಬಸವಣ್ಣನವರ ಬಹುದೊಡ್ಡ ಸಾಧನೆ,ಧಾರ್ಮಿಕ ಕ್ರಾಂತಿ.ಅದುವರೆಗೆ ಸಮಾಜದ ಉನ್ನತಜಾತಿಯವರಿಗೆ ಮೀಸಲಾಗಿದ್ದ ಗುರುಪಟ್ಟ,ಜಗದ್ಗುರುಪಟ್ಟವನ್ನು ಬಸವಣ್ಣನವರು ಅಲ್ಲಮಪ್ರಭು ದೇವರಿಗೆ ಕಟ್ಟುವ ಮೂಲಕ ‘ಜಾತಿಯಿಂದಲ್ಲ,ಆತ್ಮಶುದ್ಧಿಯಿಂದ,ಅಧ್ಯಾತ್ಮಿಕ ಸಾಧನೆಯಿಂದ ವ್ಯಕ್ತಿತ್ವಕ್ಕೆ ಬೆಲೆ’ ಎನ್ನುವ ತತ್ತ್ವ ಪ್ರತಿಪಾದಿಸುತ್ತಾರೆ.ಸಮಾಜವು ನಿಕೃಷ್ಟವೆಂದು ಭಾವಿಸಿದ್ದ ವೇಶ್ಯಾವೃತ್ತಿಯ ಸೂಳೆಸಂಕವ್ವೆಯನ್ನು ಶರಣೆಯನ್ನಾಗಿಸುತ್ತಾರೆ.ದನಕಾಯುವವರು,ಕುರಿ ಕಾಯುವವರು,ಕಸಗುಡಿಸುವವರು,ಮುಸುರೆ ತಿಕ್ಕುವವರೆಲ್ಲ ಶರಣರಾಗಿ ಅನುಭವಮಂಟಪದಲ್ಲಿ ಸ್ಥಾನ ಪಡೆಯುತ್ತಾರೆ.ಇದು ಬಸವಣ್ಣನವರೊಬ್ಬರಿಂದಲೇ ಸಾಧ್ಯವಾದ ಕಾರ್ಯ.ಸಮಾನತೆ,ಸಹೋದರತೆ,ಸಹೋದರಭಾವವನ್ನು ವಿರೋಧಿಸುವ ಅಲ್ಪಮನಸ್ಕರುಗಳು ಬಸವಣ್ಣನವರನ್ನು ವಿರೋಧಿಸುವುದು ಸಹಜ.
ದೇವರು,ಧರ್ಮವನ್ನು ಗುತ್ತಿಗೆ ಹಿಡಿದು ಅಧಿಪತ್ಯಸ್ಥಾಪಿಸಿದ್ದ ಜನರಿಗೆ ಬಸವಣ್ಣನವರು ಅಂದು ‘ ಬಿಸಿತುಪ್ಪ’ ವಾಗಿದ್ದರು; ಇಂದು ಜೀರ್ಣಿಸಿಕೊಳ್ಳಲು ಆಗದ ಉಕ್ಕಿನಗುಂಡು ಆಗಿದ್ದಾರೆ.ಹೆಚ್ಚುತ್ತಿರುವ ಬಸವಪ್ರಜ್ಞೆ,ಬಸವಣ್ಣನವರು ವಿಶ್ವಮಾನ್ಯರಾಗಿ ಬೆಳಗುತ್ತಿರುವುದನ್ನು ಸಹಿಸದ ದುರ್ಮತಿಗಳು ,ಮತಿಜಡರುಗಳು ಸೇರಿ ಬಸವಣ್ಣನವರ ಮಹೋನ್ನತ ವ್ಯಕ್ತಿತ್ವಕ್ಕೆ ಅಪಚಾರ ಎಸಗಬಯಸುತ್ತಿದ್ದಾರೆ.ಒಂದು ದೇಶ,ಒಂದು ಧರ್ಮ ,ಒಂದು ಸಂಸ್ಕೃತಿಯ ಕನಸು ಕಾಣುತ್ತಿರುವವರಿಗೆ ‘ ದೇವನೊಬ್ಬ ನಾಮಹಲವು’ ಎಂದು ಬಹುಸಂಸ್ಕೃತಿಯನ್ನು ಬೆಂಬಲಿಸಿದ ಬಸವಣ್ಣನವರು ಹೇಗೆ ಇಷ್ಟವಾಗುತ್ತಾರೆ ? ಬಹುಸಂಸ್ಕೃತಿಯ ವಿರೋಧಿಗಳಾದ ಏಕಸಂಸ್ಕೃತಿಯ ಪ್ರತಿಪಾದಕರ ಒಳತೋಟಿ ಏನು ಎಂಬುದನ್ನು ಬಸವಣ್ಣನವರ ಭಕ್ತರುಗಳು,ಅನುಯಾಯಿಗಳು ಅರ್ಥಮಾಡಿಕೊಳ್ಳಬೇಕು.ಶೈವ ಸಂಸ್ಕೃತಿ ಭಾರತದ ಮೂಲಸಂಸ್ಕೃತಿ,ಶೈವ ಧರ್ಮಭಾರತದ ಮೂಲಧರ್ಮ.ಶೂದ್ರರು,ದ್ರಾವಿಡರು ಆದ ಜನಪದರು ಭಾರತದ ಮೂಲನಿವಾಸಿಗಳು.ಭಾರತದ ನೆಲಸಂಸ್ಕೃತಿಯನ್ನು ಎತ್ತಿಹಿಡಿದರೆಂದೇ ದೇವರು ಧರ್ಮಗಳ ಏಕಸ್ವಾಮ್ಯ ಪಡೆದವರು ಬಸವಣ್ಣನವರನ್ನು ವಿರೋಧಿಸುತ್ತಾರೆ.ತುಚ್ಛಜೀವಿಗಳು ವಿರೋಧಿಸಿದರೆ ಬಸವಣ್ಣನವರ ಧವಳಶುಭ್ರವ್ಯಕ್ತಿತ್ವಕ್ಕೇನೂ ಕುಂದಡರದು.
೨೦.೧೧.೨೦೨೬